ՆԻՒԹԻ ՁԱՅՆԱԳՐԵԱԼ ՏԱՐԲԵՐԱԿԸ
Օրվա ընթերցվածք.
Ավետարան ըստ Հովհաննեսի. 8: 47-59
47 Ան որ Աստուծմէ է, Աստուծոյ խօսքերը մտիկ կ՚ընէ։ Դուք անոր համար մտիկ չէք ըներ, քանզի Աստուծմէ չէք»։
48 Պատասխան տուին Հրեաները ու ըսին անոր. «Աղէկ չե՞նք ըսեր մենք՝ թէ դուն Սամարացի ես ու դեւ կայ քու ներսդ»։ 49 Յիսուս պատասխան տուաւ եւ ըսաւ. «Իմ ներսս դեւ չկայ, հապա ես իմ Հայրս կը պատուեմ, բայց դուք զիս կ՚անարգէք։ 50 Իսկ ես իմ փառքս չեմ փնտռեր։ Կայ մէկը, որ կը փնտռէ ու կը դատէ։ 51 Ճշմարիտ ճշմարիտ կ՚ըսեմ ձեզի. ‘Եթէ մէկը իմ խօսքս պահէ, յաւիտեան մահ պիտի չտեսնէ’»։ 52 Այն ատեն Հրեաները ըսին անոր. «Հիմա գիտցանք թէ քու ներսդ դեւ կայ։ Աբրահամ մեռաւ ու մարգարէներն ալ եւ դուն կ՚ըսես. ‘Եթէ մէկը իմ խօսքս պահէ, յաւիտեան մահուան համը պիտի չառնէ’։ 53 Միթէ դուն աւելի՞ մեծ ես մեր հօրմէն՝ Աբրահամէն, որ մեռաւ ու մարգարէներն ալ մեռան. դուն քեզ ո՞վ կը կարծես»։ 54 Յիսուս պատասխան տուաւ. «Եթէ ես ինքզինքս փառաւորեմ, իմ փառքս բան մը չէ։ Իմ Հայրս է, որ զիս կը փառաւորէ, որուն համար դուք կ՚ըսէք թէ Մեր Աստուածն է, 55 Բայց զանիկա չէք ճանչնար, բայց ես կը ճանչնամ զանիկա ու եթէ ըսեմ թէ զանիկա չեմ ճանչնար, ձեզի պէս ստախօս պիտի ըլլամ. մինչդեռ ես կը ճանչնամ զանիկա եւ անոր խօսքը կը պահեմ։ 56 Ձեր հայրը Աբրահամ՝ ցանկացաւ իմ օրս տեսնել ու տեսաւ եւ ուրախացաւ»։ 57 Իսկ Հրեաները ըսին անոր. «Դուն տակաւին յիսուն տարեկան չկաս, Աբրահա՞մն ալ տեսար»։ 58 Յիսուս ըսաւ անոնց. «Ճշմարիտ ճշմարիտ կ՚ըսեմ ձեզի, Աբրահամին ըլլալէն առաջ եմ ես»։ 59 Այն ատեն քարեր վերցուցին որպէս զի անոր վրայ նետեն, բայց Յիսուս ծածկուեցաւ անոնց աչքերէն եւ անոնց մէջէն անցնելով՝ տաճարէն դուրս ելաւ ու գնաց։
Հանապազօրեայ ՀԱՑ - Հոգևոր քարոզներ 2020
Ողջույն ձեզ սիրելի հավատացյալներ. եթե նկատեցիք, երեկվա թեման ծավալուն լինելու պատճառով բաժանեցինք երկու մասին: Այսօր կսերտենք երկրորդ մասը: հովհաննես ավետարանիչը մեզ ցույց է տալիս, թե Հիսուս Քրիստոս որքան մանրամասն ու հանգամանալից է բացատրում և խոսում իր աստվածության մասին, երբեմն նույն միտքը մի քանի անգամ կրկնելով, որպեսզի ներկաներից և ոչ մեկը հետագայում չասի, որ ինքը չի լսել այդ մասին; Բայց այդքան պարզ խոսելուց հետո, նրանց տված հարցերից մենք տեսնում ենք, որ դարձյալ չեն հասկացել: Խոսելն ու բացատրելը աստվածային շնորհներ են, բայց պակաս կարևոր չեն լսելու և հասկանալու շնորհները, ինչին ականատես ենք լինում այս պարագային: Երեկ մենք կանգ առանք այն հատվածի վրա, որ Հիսուս ուղիղ հարց է ուղղում փարիսեցիներին, ասելով,- Ձեզնից ով կհանդիմանի ինձ մեղքի համար, և հիշեցինք երկու մարգարեների, որոնք նույնպես այդ հարցը տալիս են նույն ժողովրդին, և լիացուցիչ հարցով կամենում են ճշտել, եթե չեք մեղադրում, ուրեմն ճշմարտությունը է մեր խոսածը, քանի որ Աստծու խոսքն է, ապա ինչո՞ւ չեք հասկանում: Այս բոլոր հարցերը տրվում էր նրանց, ապացուցելու համար, որ նրանք չէին ճանաչում նաև Հորը, իսկ եթե մեկը չի ճանաչում Հորը, ինչպես կարող է ճանաչել Նրա ուղարկածին, որ կանգնած է իրենց աչքի առջև: Հրեաները որ հպարտանում էին Աբրահամի որդիներ լինելու հանգամանքով, դարձյալ չէին հասկանում, որ մարմնավոր ժառանգություն էր դա ոչ թե հոգևոր: Քանի որ Աբրահամն էլ մարմնավոր ժառանգ ուներ Իսմաիլ անունով, բայց ուներ նաև խոստման զավակ՝ Իսահակ անունով: նույնպես և Իսահակը ուներ Եսավ որդի և օրհնություն ստացած Հակոբ որդի:
Որդի լինելը բավարար չէ հոր համբավը և պատիվը բարձր պահելու համար: Աստվածաշնչում շատ են դեպքերը՝ հատկապես առաջնեկները, որոնք չեն արժանացել հայրերի օրհնությանը: Գործերը պետք է փաստեն հոր անվանը արժանի ժառանգորդ համարվելու մասին: Նույնիսկ Աբրահամի օրինակը բերելուց հետո էլ փարիսեցիները չհասկացան իրենց հպարտության տկարությունը, որի պատճառով պարզ բաները չեն հասկանում; Չհասկանալու համար կար ևս մեկ պատճառ: Հիսուս Քրիստոս նրանց երեսին ասում էր ողջ իրականությունը իրենց մասին, որը ծանր էր լսել, քանի որ իրենք իրենց համար կեղծ բարեպաշտության դիմակ էին պատրաստել ու կրում էին այդ դիմակը ի տես մարդկանց: Միշտ էլ դժվար է լսել ճշմարտությունը այն մարդու համար, որը կեղծ դերի մեջ է մտած: Այս երևույթը միայն հրեա ազգին չէ բնորոշ, մենք էլ մեր միջավայրում հանդիպում ենք հազարավոր կեղծ դիմակների, որոնք նույնպես չեն կարողանում հանդուրժել ճշմարտությունը: Բոլոր բացատրություններից հետո Տէր Հիսուս կարծես տալիս է նրանց մի մեղադրական եզրակացություն, ասելով,- Ով Աստծուց է, Աստծու խոսքերն է լսում, իսկ դուք չեք լսում նրա համար, քանի որ Աստծուց չեք: Այս խոսքերի համար Քրիստոսին սամարացի անվանեցին, այն էլ դիվահար: Ինչո՞ւ այդքան ծանր տարան այդ ճշմարտությունը իրենց հասցեին ասված, թե դուք Աստծուց չեք: Սիրելիներ Աստծու խոսքը բացարձակ ճշմարտություն է և նրանից բացի ուրիշ ճշմարտություն չկա: Մարդու ճշմարտությունը բացարձակ չէ, քանի որ մարդկային արդարությամբ է ասվում:
Ինչպես մարգարեն է ասում,- Մարդկային արդարություն ու ճշմարտությունը նման է օգտագործված լաթի: Քանի որ Աստծու խոսքը բացարձակ ճշմարտություն է, այն կարող է ցավացնել ամեն մարդու, որը լսում է Աստծու խոսքը: Ինչո՞ւ է ցավացնում մարդուն, որովհետև մարդը դուրս է եկել Աստծու խոսքի ճշմարտությունից և թաքնվել է մեկ այլ՝ մարդկային ճշմարտության տակ. ինչի մասին որ վերևում խոսեցինք՝ կեղծ դիմակներ անվանելով: Մեր իրականության մեջ էլ այդպես է: Ցանկացած քարոզ, որ պատրաստվում է Աստծու խոսքի հիման վրա, վերաբերում է լսողների գերակշռող մասին; Շատերը չեն հանդուրժում և հեռանում են: Ոմանք անդրադարձ են ունենում և տեսնում են իրենց այդ սխալի մեջ և որոշում են կայացնում կտրուկ ուղղել այդ սխալը, քանի չեն պատժվել սխալի պատճառով: Այսպիսիները Աստծուց են, և կարողանում են լսել Աստծու խոսքը և շտկել իրենց: Տէր Հիսուս ակնարկեց, որ ով Աստծուց է լսում է Աստծու խոսքը, ամենևին նկատի չուներ այն մարդկանց, որոնք անմեղ են: Ոչ: Այլ նրանց, որոնք լսում են, ցավ են զգում և որոշում են կայացնում շտկվել: Սրանք են որ Աստծուց են: Փարիսեցիները Հիսուսին վիրավորելու համար Նրան անվանեցին սամարացի, որի մեջ դև կա: Սամարիան հուդայականությունից անջատված աղանդավորական մի քաղաք էր, որոնց չէին ընդունում հրեաները ոչ մի առումով; Այսինքն իրենք իրենց բարձր էին դասում սամարացիներից: Բայց մենք տեսանք, որ սամարացի կինը ինչքան հեշտությամբ հասկացավ Հիսուսին ջրհորի մոտ և իր միջոցով ողջ քաղաքը լսեց Քրիստոսին և դարձի եկավ: Իսկ այստեղ Քրիստոս ժամերով խոսում է ոչ թե անգրագետ մեկի, ինչպես սամարացին էր, այլ փարիսեցի ուսյալների հետ, որոնք չեն հասկանում Քրիստոսի խոսքերը:
Հիսուս Քրիստոսին վիրավորական և մեղադրական խոսքեր ասացին այն պատճառով, որպեսզի արդարացնեն իրենց ատելությունը Քրիստոսի նկատմամբ, քանի որ շիտակ էր խոսում: Օրենսգետները և փարիսեցիները արդեն կայացրել էին որոշում Հիսուսին սպանելու վերաբերյալ, դրա համար ամեն քայլի գնում էին արդարացնելու համար իրենց որոշումը: Իսկ Տէր Հիսուս ամեն ջանք գործադրում էր նրանց նենգությունը խափանելու համար՝ իրենց փրկության համար: Նրանց այն խոսքի, որ ասացին քո մեջ դև կա, Տէր Հիսուս խաղա կերպով պատասխանեց,- Իմ մեջ դև չկա, այլ՝ պատվում եմ Հորը, իսկ դուք անարգում եք ինձ: Ես իմ փառքը չեմ փնտրում, բայց եթե մեկը պահի իմ խոսքերը, մահ չի տեսնի հավիտյան: Քանի որ օրենքի ուսուցիչները ամեն խոսք հասկանում էին ըստ մարմնի, այս խոսքն էլ հասկացան բառացի և անմիջապես բերեցին Աբրահամի օրինակը, որը մեռավ և մեռած մարգարեների օրինակը, և ասացին,- մի՞թե դու ավելի մեծ ես քան մեր հայրը՝ Աբրահամը, որ մեռավ: Անշուշտ Տէր Հիսուս նկատի չուներ այս կյանքի ֆիզիկական մահը, այլ խոսքը հավիտենական կյանքի մասին էր: Բայց այս միտքը ևս հասկանալի չեղավ օրենքը ուսուցանողներին: Հետաքրքիր է ինչպես էին նրանք մարդկանց ուսուցանում, երբ իրենք իսկ չէին հասկանում Աստծու խոսքը: Դրա համար էլ դարերով ժողովուրդը հոգևոր իմաստով անգետ է մնացել: Զարմանալի է, որ տաճարի մեջ այսպիսի վեճեր է ընթանում վարդապետների հետ, որոնք կոչված են ժողովրդին լուսաբանելու Սուրբ Գրքերը:
Այս վեճերի մեջ տեսնում ենք, որ Քրիստոս նրանց հետ խոսում է երբեմն որպես մարդ, երբեմն որպես Աստված, երբեմն երկուսը միասին: Միայն թե որևէ կերպով նրանց հասանելի դարձնի իր ասելիքը, քանի որ ժամանակը սահմանափակ է իր երկրի վրա մնալու և այդ մասին գիտե ինքը միայն: Այստեղ խոսում է որպես Աստված և ասում է, - Իմ Հայրը, որին դուք ձեր Աստվածն եք համարում փառավորում է Ինձ, և դուք նրան չեք ճանաչում, բայց ես ճանաչում եմ Նրան: Եթե ասեմ, որ չեմ ճանաչում Հորը, ձեր նման ստախոս կլինեմ: Եթե երկրավոր օրինակներով է խոսում և փարիսեցիները չեն հասկանում, ապա ինչպես կարող են հասկանալ եթե Աստվածային խոսքեր խոսի: Քրիստոս խոսում և գործում է որպես Աստվածամարդ, որպեսզի հասկանալի լինի ամենքին; Վերջին միտքը, որ արտահայտեց Տէր Հիսուս, ասելով, որ ճանաչում է Աբրահամին և ինքն էր մինչև Աբրահամի լինելը: Այսինքն ոչ Քրիստոս կար մինչև Աբրահամի լինելը այլ Քրիստոս որևէ ժամանակի հետ չի առնչվում, քանի որ ի սկզբանե էր Բանը: Աբրահամը, որ ազգերի հայր կոչվեց, գիտեր որ Աստված խոստում է տվել, որ իր սերնդով է օրհնվելու ժողովուրդը: Աստված իրեն կոչեց Աբրահամի Աստված, և այս սերունդը որը մեղքի մեջ էր ապրում, հպարտանում էր Աբրահամի համբավով և հաստատում մնացին իրենց հպարտության մեղքի մեջ: Օրենսգետները և վարդապետները չկարողացան հանդուրժել այն միտքը, որ Տէր Հիսուս ասաց, թե՝ Ինքն էր մինչև Աբրահամի լինելը և քարեր վերցրին, որ գցեն նրա վրա, բայց Հիսուս խույս տվեց նրանցից և տաճարից հեռացավ:
Այս բոլոր խոսակցությունները լսելուց հետո գալիս ենք այն եզրահանգման, որ իրենց մեջ դև ունեցողները դիվահար են համարում Նրան, ով տեսնում է իրենց ներսի նենգավոր ու մարդասպան մարդուն: Սիրելիներ Աստծու մասին սխալ պատկերացումը, կամ մարդու կողմից հորինված ու երևակայական աստված ստեղծելը կարող է մարդուն առանց պատճառի տանել կործանման, մոլորության, և վերջապես դատաստանի: Հստակ է ասված, երբ անձը Աստծուց չէ, նա չի կարող լսել Աստծու խոսքը: Լսելու հետո մեղադրում է Նրան՝ անվանելով աղանդավոր, Գալիլիացի, դիվահար, քարեր են վերցնում հարվածելու համար, ծրագիր են մշակում սպանելու համար: Ամենևին չեն ուզում տեսնել իրենց մեջ գործող մեղքը: Հպարտությունն ու համառությունը ստիպեցին հրեա կրոնավորներին մեղադրել նույնիսկ Հիսուս Քրիստոսին՝ Աստծու Որդուն, որին իբրև իրենք պաշտում են; Քրիստոս ասում է, - Եթե մեկը իմ խոսքը պահի, մահ չի տեսնի հավիտյան: Ուրեմն մենք ինչպե՞ս կարող ենք պահել Աստծու խոսքը, եթե Սուրբ Գիրքը չլինի մեր սեղանի ու մեր ձեռքի բաց գիրքը: Պողոս առաքյալն ասում է Աստծու խոսքը երկսայրի սուր է, և պաշտպանվելու համար է, և հարձակվելու համար է, և՛ ամուր վահան է մեր պաշտպանության համար: Սիրելիներ, մենք տեսանք, որ նախապես մարգարեություններում գրված Հիսուս աշխարհ եկավ և եկավ իր յուրայինների մոտ և նրանք Իրեն չընդունեցին, իսկ ովքեր որ ընդունեցին , նրանց իրավունք տվեց Աստծու որդիներ կոչվելու: Այսպես է նաև հիմա, մեր օրերում և այպես է լինելու մինչև աշխարհի վախճանը:
Բայց ոչ ոք չի համարձակվի ապրել աշխարհի վայելքների մեջ՝ անօրենությամբ, կարծելով, որ դեռ ժամանակ ունի մինչև աշխարհի վախճանը, որովհետև այդ մասին էլ է գրված, թե՝ այս գիշեր հոգիդ առնեն, ինչ կլինի քո բոլոր ծրագրերը: Կամ ինչպես որ մեկ այլ տեղում ասում է, որ աշխարհի վախճանը կգա գողի պես, երբ որ չեք սպասում նրա: Այս գլխի մեջ մենք տեսանք ամուր կապ ճշմարտության և ազատության միջև: Ընդունելով Քրիստոսի ճշմարիտ ուսուցումը միանգամայն ազատ կլինենք մեղքերից և կկոչվենք Քրիստոսի աշակերտներ: Շտապենք մենք դառնալ Քրիստոսի համար յուրայիններ, քանի որ իր յուրայինները իրեն չընդունեցին որպես Աստծու Որդի: Շտապենք մենք արժանանալ Քրիստոսի ծառաներ կոչվելու, քանի որ հրեաները չկամեցան ծառայել Հիսուսին՝ հպարտության պատճառով: Անշուշտ բոլոր հրեաների մասին չէ խոսքը, որ չհավատացին Հիսուսին: Նույնիսկ երբ Տէր Հիսուս ասաց, որ դուք հոր կողմից սատանայի զավակներ եք, դարձյալ բոլոր հրեաներին նկատի չուներ: Քանի որ մի մասը հավատացին, իսկ մի մասը՝ ոչ: Նույնիսկ չհավատացող մասին էլ չէր վերաբերում այս խոսքերը, քանի որ չէին հավատում, նաև չէին հակաճառում: Այդ խոսքերը ունեին մշտական հասցեատեր,, դրանք փարիսեցիներն ու օրենքի ուսուցիչներն էին, քանի կրոնական վարդապետները լավ գիտեին մարգարեություններն ու Սուրբ Գրքերը: Սիրելիներ, այս երևույթ կարող է պատահել ամեն դարաշրջանում և ամեն տեղ: Երբեմն եկեղեցու անդամների մեջ կարող է պատահել, որ գիտե Սուրբ Գիրքը, բայց հակառակվում է Աստծուն;
Իսկ ավելի շատ հակառակվում են եկեղեցուն: Այստեղ մի փոքր ճշտում մտցնենք: Տէր Հիսուս կանգնեց բոլորի առջև և ասաց,- Ձեզնից ո՞վ կարող է ինձ մեղադրել մեղքի համար: Բնականաբար ոչ ոք չէր կարող Նրան մեղադրել, քանի որ Ինքը հենց Ճշմարտությունն է: ներկաները ստիպված էին համաձայնել այդ մտքի հետ: Այսօր չի կարող որևէ մարդ կամ եկեղեցու սպասավոր կանգնել մարդկանց առջև և տալ նույն հարցը, քանի որ մեղավոր մարդիկ են բոլորն էլ: Բայց ոչ ոք չի կարող մեղադրել որևէ հոգևորականի՝ Եկեղեցու մեջ Աստծու խոսքը սխալ կարդալու կամ սխալ մեկնաբանելու պատճառով: Աստծու խոսքի ընթերցումն ու մեկնությունը վերապահված է հոգևորականին՝ եկեղեցուց ներս և դուրս, և այնտեղ սխալ չի կարող լիներ, քանի որ Հիսուս Քրիստոսի խոսքն ու գործը բացարձակ ճշմարտություն է; Այս տարբերությունը պետք է իմանան հավատացյալները, քանի որ շատ ենք լսում որ որևէ թերության պատճառով մարդիկ հեռանում են եկեղեցուց: Չէ որ հոգևորականը իրեն չի քարոզում, այլ՝ Հիսուս Քրիստոսին: Եթե տեսնեք, որ հոգևորականը իր մասին է քարոզում և իր փառքն է փնտրում, ոչ թե Հիսուս Քրիստոսի, այդպիսի հոգևորականին մի լսեք: Բայց հոգևորականի քարոզած Ավետարանի խոսքի վերաբերյալ կասկած ունենալը մեղք է, այնպես, ինչպես որ փարիսեցիներ չհավատացին: Աստծուն փնտրող հավատացյալը անպայման կգտնի Հիսուս Քրիստոսին, իսկ նա ով չի փնտրում, նրա համար ամենի ինչ և ամեն ոք սխալ են թվում; Նա ով չի փնտրում Աստծուն, կամ չի լսում Աստծու խոսքը, կամ լսում և չի հավատում, այս մարդկանց արարքը հավասար է այն հրեաների արարքին, որոնք քարեր վերցրին, որ գցեն Նրա վրա: Փառք Աստծուն, բոլոր նրանց համար, որոնք փնտրում, գտնում, լսում և հավատում են, որ Հիսուս Քրիստոսն է Ճանապարհը և Ճշմարտությունը, և ազատ են ամեն տեսակ մեղքի ծառայությունից: Սիրելիներ այսօր ավարտեցինք նաև ութերորդ գլուխը Հովհաննեսի ավետարանի: Վաղը Աստծու կամքով կսկսենք իններորդ գլխի առաջին մասի սերտողությունը:
Թող համբերության և մխիթարության Աստվածը ձեզ շնորհ տա, որ դուք համախոհ լինեք միմյանց՝ ըստ Հիսուս Քրիստոսի, որպեսզի միասիրտ և միաբան փառավորեք Աստծուն՝ մեր Տէր Հիսուս Քրիստոսի Հորը: Թող Հույսի Աստվածը լիացնի ձեզ ամենայն ուրախությամբ և խաղաղությամբ, որպեսզի դուք էլ Սուրբ Հոգու զորությամբ՝ հույսով առատանանք:
Աղօթքներ
Ծնկի եմ եկել քո առաջ Տեր իմ,
Իմ կյանքում ես շատ եմ թերի..
Լսիր աղոթքս, աղերսում եմ քեզ
Ապաշխարության համար եմ ծնկել,
Եվ միշտ եմ ծնկած,
Տկար է հոգիս
Եվ իմ հավատքում ես շատ եմ տկար..
Խոնարհ սրտեր ես դու սիրում Հայր իմ,
Խոնարհեցնում եմ սիրտս քո առաջ,
Ներիր մեղքերս, բուժիր վերքերս..
Գալիս եմ ես քեզ, չմերժես հոգիս,
Մեղքերս բազում են
Եվ դու ողորմած, ողորմյա և ինձ,
Վերցրել եմ խաչս հետևում եմ քեզ..
Մի թող աչքերիս խոտորվել աջ, ձախ,
Ուժ տուր ինձ Հիսուս, Ու ես գալիս եմ..
Վախենում եմ որ այս կեղծ աշխարհի՝
Պես պես հմայքները կկլանեն ինձ, կշեղեն քեզնից..
Հայր իմ լավ գիտեմ դու սիրում ես ինձ,
Ինձ այս աշխարհիկ սերերը պետք չեն,
Այլ միայն քոնը, ամենասուրբը..
Ես քո զավակն եմ ծնվածս օրից,
Եվ ամբողջ կյանքս քո ձեռքերում է
Քո կամքը լինի նաև իմ կյանքում..
Չթողնե՛ս դու ինձ այս օտար աշխարհում
Քո առաջ եմ ես ապաշխարում,
Հանձնում եմ կյանքս, հոգիս ու սիրտս,
Դու տնօրինիր նրանց քո կամքով..
Շատերն են ուզում իմ կործանումը
Տեր իմ, լավ գիտես բայց ներիր նրանց,
Թող իմ պատճառով ոչ ոք չկորչի..
Թշնամիներ ես բնավ էլ չունեմ,
Ու բոլորին եմ ես սիրում այնպես՝
Ինչպես քո կամքն է, դա էլ լավ գիտես..
Ես չեմ խնդրում այս կյանքում ոչինչ
Բացի մի բանից՝ ներիր մեղքերս,
Որ երբ դու գաս քո Փառքով,
Ես էլ լինեմ աջ կողմումդ, որ չամաչեմ,
Այլ պարզ ճակատով քո առաջ ընկնեմ,
Քեզ Փառաբանեմ.. Հավիտյանս Ամեն
Տ. Արմէն Մելքոնեան
Tigran Mkhitaryan Մենք ոչ մի բան չունենք: Պետք է ուրախանանք, գոհանանք և փառավորենք մեր Տեր Աստծուն: Որովհետեւ ամեն գիտության և բարի գործերի աղբյուրը Տեր Հիսուս Քրիստոսն է:
Meruzhan Gamer թող Աստծո խոսքը խորը թափանցի մեր սրտերը իմաստություն և խաղաղություն ստանանք և ճիշտ ապրենք մեր հին մարդուն չկերակրենք այլ կերակրենք նորը հարստություն է երջանկություն է ցնցություն է այդ նորը մեր:
Lilit Holikyan Ճմարիտ լույս, միակ հույս և փրկության անաղարտ ճանապարհ, որ բաշխվեց մեզ առատորեն, առանց վերապահումների, որպեսզի գրկենք հավերժությունն ու կյանքը։ Լինենք խոնարհությամբ սովորողներ ճշմարիտը ճանաչելու մեջ:
Arus Hakobyan
Աստված, որին լքել՝ նշանակում է կորստյան մատնվել,որին ձգտել՝ նշանակում է սիրել, որին տեսնել՝ նշանակում է ունենալ:Աստված, դեպի որն է մեզ մղում հավատքը, վերամբարձում՝ հույսը, միավորում՝ սերը:Աստված, որի զորությամբ հաղթում ենք հակառակորդին:Ամեն