ՆԻՒԹԻ ՁԱՅՆԱԳՐԵԱԼ ՏԱՐԲԵՐԱԿԸ
Օրվա ընթերցվածք.
Ավետարան ըստ Հովհաննեսի. 9:1-41
ՅԻՍՈՒՍ Ի ԾՆԷ ԿՈՅՐԸ ԿԸ ԲԺՇԿԷ
1 Երբ կ՚անցնէր, մարդ մը տեսաւ կոյր ծնած։ 2 Իր աշակերտները հարցուցին իրեն ու ըսին. «Ռա՛բբի, որո՞ւնն է մեղքը, ասո՞ր թէ իր ծնողքին, որ անիկա կոյր ծնաւ»։ 3 Պատասխան տուաւ Յիսուս. «Ո՛չ ատորն է մեղքը, ո՛չ ալ իր ծնողքին, հապա որպէս զի Աստուծոյ գործերը ատոր վրայ յայտնի ըլլան։ 4 Քանի որ ցորեկ է, պէտք է որ զիս ղրկողին գործերը գործեմ. գիշերը կու գայ, երբ մէկը չի կրնար գործել, 5 Քանի որ աշխարհի մէջ եմ, աշխարհի լոյսն եմ»։ 6 Երբ այս ըսաւ, թքաւ գետինը եւ թուքով կաւ շինեց, այն կաւը կոյրին աչքերուն վրայ ծեփեց 7 Եւ ըսաւ անոր. «Գնա՛, լուացուէ՛ Սելովամի աւազանին մէջ», (որ «ղրկուած» կը թարգմանուի։) Ան ալ գնաց ու լուացուեցաւ, եկաւ ու կը տեսնէր։ 8 Դրացիները եւ անոնք որ առաջուընէ տեսած էին զանիկա որ կոյր էր, կ՚ըսէին. «Ասիկա չէ՞ր որ կը նստէր եւ կը մուրար»։ Ոմանք կ՚ըսէին. «Անիկա է»։ 9 Ուրիշներ կ՚ըսէին. «Անոր նման մէկն է», իսկ ինք կ՚ըսէր. «Ես եմ»։ 10 Ուստի հարցուցին իրեն. «Հապա ի՞նչպէս բացուեցան քու աչքերդ»։ 11 Ինք պատասխան տուաւ ու ըսաւ. «Յիսուս կոչուած մարդ մը կաւ շինեց ու աչքերս ծեփեց եւ ըսաւ ինծի. ‘Գնա՛ Սելովամի աւազանը ու լուացուէ՛’. ես ալ գացի, լուացուեցայ ու կը տեսնեմ»։ 12 Ըսին իրեն. «Ո՞ւր է անիկա»։ Ըսաւ անոնց. «Չեմ գիտեր»։
ՓԱՐԻՍԵՑԻՆԵՐԸ ԲԺՇԿՈՒՈՂԸ ԿԸ ՀԱՐՑԱՔՆՆԵՆ
13 Փարիսեցիներուն տարին զանիկա, որ ատենով կոյր էր։ 14 Շաբաթ օր էր, երբ Յիսուս կաւը շինեց ու անոր աչքերը բացաւ։ 15 Փարիսեցիներն ալ կը հարցնէին իրեն թէ՝ «Ի՞նչպէս կը տեսնէ»։ Անիկա ալ ըսաւ անոնց. «Կաւ դրաւ աչքերուս վրայ ու լուացուեցայ եւ կը տեսնեմ»։ 16 Ասոր վրայ փարիսեցիներէն ոմանք կ՚ըսէին. «Այն մարդը Աստուծմէ չէ, վասն զի շաբաթ օրը չի պահեր»։ Ուրիշներ կ՚ըսէին. «Ի՞նչպէս կրնայ մեղաւոր մարդ մը այսպիսի հրաշքներ ընել»։ Անոնց մէջ երկպառակութիւն կար։ 17 Նորէն ըսին կոյրին. «Դուն ի՞նչ կ՚ըսես անոր համար, որ քու աչքերդ բացաւ»։ Ան ալ ըսաւ թէ՝ ‘Մարգարէ մըն է’։ 18 Իսկ Հրեաները չէին հաւատար՝ թէ կոյր էր ու բացուեցաւ, մինչեւ որ անոր ծնողքը կանչեցին, 19 Եւ անոնց հարցուցին. «Ա՞յս է ձեր որդին, որուն համար դուք կ՚ըսէք թէ կոյր ծնաւ. հապա հիմա ի՞նչպէս կը տեսնէ»։ 20 Անոր ծնողքը պատասխան տուին անոնց ու ըսին. «Գիտենք թէ ասիկա է մեր որդին եւ որ ինք կոյր ծնաւ։ 21Բայց հիմա ի՞նչպէս կը տեսնէ՝ չենք գիտեր, կամ թէ ո՞վ բացաւ ատոր աչքերը՝ մենք չենք գիտեր, ինք չափահաս է, իրեն հարցուցէք, թող ինք խօսի իրեն համար»։ 22 Այսպէս ըսին անոր ծնողքը Հրեաներէն վախնալնուն համար, քանզի Հրեաները միաբան հաւանութեամբ որոշեր էին, որ եթէ մէկը զանիկա Քրիստոս դաւանի, ժողովարանէն դուրս ձգուի։ 23 Ասոր համար անոր ծնողքը ըսին թէ «Ինք չափահաս է, իրեն հարցուցէք»։ 24 Ետքը նորէն կանչեցին այն մարդը որ կոյր էր ու ըսին անոր. «Աստուծոյ փառք տուր, մենք գիտենք թէ այն մարդը մեղաւոր է»։ 25 Անիկա ալ պատասխան տուաւ ու ըսաւ. «Եթէ մեղաւոր է՝ ես չեմ գիտեր. միայն այս գիտեմ թէ կոյր էի եւ հիմա կը տեսնեմ»։ 26 Նորէն ըսին անոր. «Ի՞նչ ըրաւ քեզի, քու աչքերդ ի՞նչպէս բացաւ»։ 27 Պատասխան տուաւ անոնց. «Հիմա ըսի ձեզի ու չլսեցի՞ք. ինչո՞ւ համար նորէն լսել կ՚ուզէք. միթէ դո՞ւք ալ կ՚ուզէք անոր աշակերտ ըլլալ»։ 28 Անոնք նախատելով զանիկա, ըսին. «Դուն ես անոր աշակերտը, իսկ մենք Մովսէսին աշակերտներն ենք։ 29 Մենք գիտենք թէ Աստուած Մովսէսին հետ խօսեցաւ, բայց ասիկա չենք գիտեր թէ ուրկէ՞ է»։ 30Պատասխան տուաւ մարդը եւ ըսաւ անոնց. «Ատիկա է զարմանալի բանը՝ որ դուք չէք գիտեր թէ ուրկէ՞ է, բայց անիկա իմ աչքերս բացաւ։ 31 Գիտենք թէ Աստուած մեղաւորներուն մտիկ չըներ, բայց եթէ մէկը աստուածապաշտ ըլլայ ու անոր կամքը կատարէ, անոր մտիկ կ՚ընէ։ 32 Աշխարհի սկիզբէն ի վեր լսուած չէ որ մարդ մը կոյր ծնածի մը աչքերը բացած ըլլայ։ 33 Եթէ Աստուծմէ չըլլար այն մարդը, բա՛ն մըն ալ չէր կրնար ընել»։ 34 Պատասխան տուին եւ ըսին անոր. «Դուն բոլորովին մեղքերու մէջ ծնած ես ու մեզի վարդապետութի՞ւն կ՚ընես»։ Եւ դուրս ըրին զանիկա։
ՀՈԳԵԿԱՆ ԿՈՒՐՈՒԹԻՒՆ
35 Յիսուս լսեց թէ զանիկա դուրս ըրին, երբ գտաւ զանիկա, ըսաւ անոր. «Դուն կը հաւատա՞ս Աստուծոյ Որդիին»։ 36 Անիկա պատասխան տուաւ ու ըսաւ. «Տէ՛ր, ո՞վ է՝ որ հաւատամ անոր»։ 37 Յիսուս ըսաւ անոր. «Տեսար զանիկա, քեզի հետ խօսողը՝ ա՛ն է»։ 38 Անիկա ալ ըսաւ. «Կը հաւատամ, Տէ՛ր» ու անոր երկրպագութիւն ըրաւ։ 39 Յիսուս ըսաւ. «Ես դատաստանի համար եկայ այս աշխարհը, որպէս զի չտեսնողները տեսնեն եւ տեսնողները կուրանան»։
40 Փարիսեցիներէն ոմանք, որոնք իրեն հետ էին, այս բաները լսելով՝ ըսին իրեն. «Միթէ մե՞նք ալ կոյր ենք»։ 41 Յիսուս ըսաւ անոնց. «Եթէ կոյր ըլլայիք, դուք մեղք չէիք ունենար, բայց հիմա կ՚ըսէք թէ ‘Կը տեսնենք’, ասոր համար ձեր մեղքը ձեր վրայ կը մնայ»։
Հանապազօրեայ ՀԱՑ - Հոգևոր քարոզներ 2020
Ողջույն ձեզ սիրելի հավատացյալ համայնք. Ութերորդ գլխի ավարտին տեսանք, թե կարծեցյալ հավատացյալ հրեաները ինչպիսի վիրավորական խոսքերով խոսեցին Հիսուսի հետ, և ավարտին էլ քարեր վերցրին, որ հարվածեն: Բայց այդ խոսակցության մեջ մի բան էլ հայտնի դարձավ, որ իրոք ավետարանիչները շատ խոսակցություններ ուղղակի գրի չեն առել, քանի որ փարիսեցիները Հիսուսին ասում են,- Մենք լավ չե՞նք ասում, թե սամարացի ես դու, և քո մեջ դև կա: Մենք ուրիշ տեղում չենք հանդիպել այսպիսի միտք, որ Հիսուսին ասեն սամարացի ես: Սա համապատասխանում է Հովհաննես առաքյալի այն խոսքին, որ իր ավետարանի ավարտին ասում է,- Բայց ուրիշ շատ բաներ էլ կան որ Հիսուս արեց, որոնք եթե մեկը մեկ առ մեկ գրած լիներ, կարծում եմ թե աշխարհն իսկ բավական չէր լինի պարփակելու այդ գրքերը, եթե դրանք գրված լինեին; Ուրեմն Սուրբ Հոգու թելադրանքով գրվել են այն ամենը, ինչը ընդհանուր պատկերացում պետք է տար ընթերցողին՝ որպեսզի ամեն մի երևույթը հասկանա ավետարանի համատեքստի մեջ, ոչ թե առանձին մտքեր վերցրած: Շատ կարևոր է նաև զգալ մեկ այլ նրբություն, որ Հիսուս Քրիստոս բացահայտում է կրոնավորների կեղծիքները և բացահայտ ասում նրանց երեսին, սակայն երբ իրեն վիրավորում են, ոչ մի բացասական պատասխան չի տալիս: Սա ահռելի դաս է մեզ համար, որ և՛ չենք հիմնվում Աստծու խոսքի ճշմարտության վրա, և՛ չենք հանդուրժում մեզ արված որևէ նկատողություն: Տէր Հիսուս գիտեր, որ ինքն է ճշմարտությունը և կարիք չուներ արդարանալու կամ պաշտպանվելու որևէ մեկի վիրավորանքից: Իսկ մեր հակահարձակումները և ինքնապաշտպանությունը գալիս են փաստելու, որ մեզ ուղղված նկատողությունը տեղին է և ճշմարտություն է: Երբ Հիսուսին ասացին քո մեջ դև կա, Նա ուղղակի պատասխանեց, որ իմ մեջ դև չկա, այլ ես պատվում եմ Իմ Հորը: Ի՞նչ կապ կա այս մտքերի մեջ: Հիսուս կամեցավ նրանց հասկացնել, որ ես թույլ չեմ տա, որ կեղծավորները ու ստախոսները իրենց համարեն Աստծու որդիներ և այդպես էր պատվում Հորը, որովհետև նրանք ուղղակի իրենց համարում էին Աստծու որդիներ, չճանաչելով այդ Աստծուն, վիրավորում են Աստծու իրական Որդուն, բայց այդ վիրավորանքը Որդու նկատմամբ, անպատասխան չի մնա հենց Հոր կողմից, որին իրենց հայր են համարում: Չէ՞ որ ամեն փառք և իշխանություն Հայրը տվեց Որդուն; Եթե մենք էլ պահենք Քրիստոսի ամեն խոսք, հավիտյան չենք մեռնի: Որովհետև Աստծուց հեռու մարդը ապրում է այս աշխարհում, բայց հոգով մեռած է վաղուց: Հրեաները Քրիստոսի այդ խոսքը նույնպես չհասկացան, և Նրան նորից վիրավորեցին, ասելով,- Դու քեզ ո՞ւմ տեղն ես դնում: Նկատի ունեին Նրա ազգաբանությունը՝ ըստ իրենց աչքի տեսածի, որ հյուսնի որդի էր և ճանաչում էին նրա ազգությանը:
Ամեն անգամ նրանց չարախոսությանը ընդառաջ՝ հանդիպում է մի այնպիսի հրաշագործություն, որպեսզի բացվի նրանց աչքերը, բայց անօգուտ է ամեն խոսք ու հրաշք, եթե ենթական մի քայլ գոնե չի անում դեպի լույսը: Սրանք այն հրեաներն էին, որոնց մասին 8 րդ գլխի սկզբից կարդացինք, որ հավատացյալ հրեաների համար էր խոսում Հիսուս տաճարի մեջ: Երբ քարեր վերցրին որ հարվածեն Նրան, Նա խույս տալով դուրս եկավ տաճարից և աշակերտների հետ քայլում էր, երբ ի ծնե մի կույր մարդ տեսավ, որին համար աշակերտները հարց տվեցին իրենց Վարդապետին, թե՝ Ռաբբի, ո՞ւմ մեղքն է, որ կույր է ծնվել, իրե՞նն է, թե՞ հորն ու մորը: Տէր Հիսուս նոր էր հեռացել տաճարից և նրանց խոսքերի հիման վրա պատասխան տվեց աշակերտներին, ասելով,- Ո՛չ դրա մեղքն է, ո՛չ էլ իր հոր ու մոր, այլ՝ որպեսզի դրա վրա Աստծու գործերը հայտնի լինեն: Այս խոսքերը ասաց, քանի որ ,,հավատացյալ,, հրեաները չհավատացին Նրա ասած ո՛չ մի խոսքին, թե՝ Աստծու Որդին է, կամ որ ինքը կա՛ր նախքան Աբրահամի լինելը, կամ. որ Ինքը պատվում է Հորը և այլն և առհասարակ ո՛չ մի խոսքին չհավատացին: Տէր Հիսուս հասկացավ նաև աշակերտների տված անհավանական հարցը, քանի որ ինչպե՞ս կարող է մեկը մեղք գործել նախքան ծնվելը, չէ՞ որ այդ կույրը ի ծնե էր կույր: Աշակերտների մեջ էլ կար հեթանոսական այն սնոտի մտածումը, թե իբրև հոգին մինչև մարմնին միանալը մեղավոր աշխարհում է, և երբ միանում է մարդուն ենթական արդեն մեղավոր է ծնվում; Բայց Հիսուս ամեն բան լուսաբանում է ժամանակին և իր տեղում: Աշակերտները նաև լսել էին իրենց օրենքում, որ զավակը չի պատժվում հոր մեղքի համար: Դրա համար ի ծնե կույրի հարցը իրենց հետաքրքիր եղավ: Նախորդ մեղավորի դեպքում էլ լսել էին, որ Հիսուս ասաց, գնա, այլևս չմեղանչես, որ ավելի վատ բան չպատահի քեզ: Ապա ի՞նչ է այս կույրի հարցը: Մենք արդեն համոզվել ենք, որ Տեր Հիսուս սիրով է պատասխանում անկեղծ տրված հարցերին: Այս կույրի վրա պետք է ի հայտ գար Աստծու գործերը՝ հրեաների համար, քանի որ Տէր Հիսուս պետք է գործեր քանի ցերեկ է, ինչպես որ Ինքն է ասում:
Իսկ երբ գա գիշերը, ոչ ոք չի կարող գործել: Որովհետև Ինքը աշխարհում է, և աշխարհի Լույսն է: Այս խոսքերով անշուշտ Տէր Հիսուս չարդարացրեց կույրի ծնողների մեղքը և չասաց, որ ծնողները մեղք չեն գործել: Բայց բացատրեց, որ արդարացի չէ ծնողների գործած մեղքի համար պատժել զավակներին: Այս խոսքերը ասում էր հիմնվելով Եզեկիել մարգարեի այն խոսքին, որ Աստված արգելում է, որ իսրայելացիների մեջ կրկնվի այն առակը, որ ասվում է,- Հայրերն ազոխ են կերել, զավակների ատամներն է առել: Տէր Հիսուս ցերեկ է անվանում այս աշխարհը և կյանքը, որտեղ մարդիկ կարող են դեռ հավատալ Հիսուս Քրիստոսին:
Իսկ հանդերձյալը գիշեր է ոչ ոք չի կարող գործել և չի կարող հավատալ: Աշխարհի լույսն եմ ասելով, պետք է դա ցույց տար կույրի վրա, որպեսզի իր լուսավոր գործերը հայտնի լինի հոգով մթագնած փարիսեցիներին; Այսինքն ի ծներ կույրի աչերը բացելով պետք է բացեր նաև փարիսեցիները կույս միտքը: Թքեց գետնին և թքով կավ շինեց, և կավը ծեփեց կույրի աչքերի վրա ու ասաց նրան, - Գնա լվացվիր Սիլովամի ավազանի մեջ: Գնաց լվացվեց և եկավ և տեսնում էր: Ինչու մեկին հեշտությամբ և խոսքով է բժշկում իսկ այս կույրին թքով, կավով և լվացվելով բուժեց : Հայրերն ասում են, որ կավը Ադամի օրինակն է, և փարիսեցիներին փաստելու համար իր աստվածությունը, տարբեր գործողություններ է կատարում, որպեսզի հասկանան, որ ինքը կար Ադամի ստեղծելիս և կավից ստեղծելուց հետո լույս տվեց նաև նրա աչքերին: Իսկ թե ինչու միայն չասաց, գնա լվացվիր և կտեսնես, որպեսզի ներկաները չմտածեին, որ Սիլովամի ջրի զորությունն է այդ բժշկությունը, այլ՝ իր զորավոր գործերից դա: Որպեսզի ներկա գտնվողները տեսնեին այդ բոլոր գործողությունները և հետո տեսնեին կույրին՝ տեսնելիս և հավատային; Կույրին ճանաչող մարդիկ տեսան և կասկածում էին, թե նաև, բայց կույրը, որն արդեն տեսնում էր, բացահայտ պատմեց այն բոլոր մանրամասները, ինչ որ Հիսուս արել էր իր աչքերի համար: Նաև ասաց, որ ինքն է կույրը որպեսզի չտարակուսեն, և ասաց, որ Հիսուս էր Նրա անունը:
Կույրը նախկինում մուրացկան էր, և բոլորը նրան ճանաչում էին, իսկ հիմա նա վկայում է Քրիստոսի մասին; Նրան ճանաչում էին նաև փարիսեցիները, որ տաճարի առջև էր նստում: Կույրը Քրիստոսին մարդ է անվանում, և ասում է այդ մարդու անունը Հիսուս էր, քանի որ դեռ ոչինչ չգիտեր Նրա մասին: Տէր Հիսուս կույրի խոսքին ուշադրություն չդարձրեց, քանի որ նրանից ակնկալիք չուներ որ իրեն դավանի առանց Իր գործերը տեսնելու: Քանի որ տեսնելուց հետո կամավոր է դավանելու Աստծու Որդի: Լուրը արագ տարածվեց և բոլորը հարցնում էին կույրին, թե ինչպե՞ս եղավ Կույրն էլ բոլորին պատմում էր այնպես ինչպես որ պատահել էր: Եվ բոլորին ասում էր,- Ե՛ս եմ այն կույրը : Բոլորը հարցնում էին,- Իսկ ուր է Նա: Հերթը հասավ փարիսեցիներին, քանի որ կույրին բերել էին փարիսեցիների մոտ, և օրը շաբաթ էր, երբ Հիսուս կավով բուժեց կույրին: Նրանք կույրին հարցրին,- Ինչպե՞ս ես տեսնում: Կույրը նորից պատմեց, որ կավ դրեց իր աչքերին, լվացվեց և հիմա տեսնում է: Իսկ փարիսեցիները իրենց հերթական մեղադրանքը առաջադրեցին Հիսուսին՝ շաբաթը չպահելու համար, նույնիսկ բարձրաձայն ասացին, որ այդ մարդը Աստծուց չէ, քանի որ շաբաթը չի պահում: Շատերն էին զարմանում այս խոսքերի վրա, թե ինչպես կարող է մի մեղավոր մարդ այսպիսի զարմանահրաշ գործեր կատարել: Այդ դեպքի ու այս խոսքերի պատճառով ժողովրդի մեջ պառակտում եղավ: Հիսուս դարձյալ թաքնվեց նրանց աչքից, քանի որ տեսնող կույրին էին հարցնում թե ուր է Նա, ով քեզ բուժեց: Հրաշքը տեսնելուց հետո որոշ փարիսեցիներ մտափոխվեցին, ասելով մեղավոր մարդը չի կարող հրաշք գործել, իսկ մյուս առաջնորդները միայն պնդում էին, որ շաբաթը խախտողը Աստծուց չէ:
Բայց ի՛նչ նշանակություն ուներ շաբաթ օրը կույրի համար, երբ ինքն արդեն տեսնում էր, և համարձակ շրջում էր բոլորի աչքի առջև: Երբ կամեցան բժշկվածի կարծիքն իմանալ Հիսուսի մասին, նա այս անգամ արդեն ասաց,- մարգարե՛ է: Փարիսեցիները չբավարարվեցին կույրի հարցաքննումով և կանչեցին աչքերը բացվածի ծնողներին և նույն հարցերը տվեցին ասելով,- Սա է ձեր որդին, որի մասին ասում էիք, թե կույր է ծնվել, իսկ հիմա ինչպե՞ս է որ տեսնում է: Ծնողները փաստեցին, որ իրենց որդին էր այդ տղան, նաև փաստեցին, որ ի ծնե կույր է եղել, սակայն ինչպե՞ս է հիմա տեսնում, այ՛դ մասին իրենք չգիտեն: Նույնիսկ չգիտեն, թե ո՛վ բացեց նրա աչքերը: Աչքերը բացվածի ծնողները նույնիսկ վախեցան այդ հարցաքննությունից, քանի որ եթե փարիսեցիները իմանային, որ նրանք կապ ունեն Հիսուսի հետ, թույլ չէին տալու ժողովարան մտնեն: Խստասիրտ կրոնավորները ծանր կացության առջև դրեցին ծնողներին, որպեսզի մեղադրեն Նրան շաբաթ օրը չպահելու համար, անտեսելով՝ զորավոր հրաշքը՝ ի ծնե կույրի աչքերի բժշկությունը: Հավանաբար կույրն էլ իր հերթին լսել էր, որ եթե մեկը նրան Քրիստոս դավանի, կհեռացնեն ժողովարանից, բայց գերադասեց լույսը՝ քան բռնությունը փարիսեցիներից եկած, թե կարգելեն ժողովարան մտնել: Կույրը պատրաստ էր ժողովարան չմտնել, հատկապես, որ ժողովարանում ոչինչ էլ չէին սովորեցնում: բայց չէ՞ որ ինքը ազատվել էր անպատիվ մուրացիկությունից և այժմ կարող էր իր տեսողության շնորհիվ աշխատել և ապրել այլոց նման; Նա տեսել էր Քրիստոսի ամենամեծ ողորմությունը և պատրաստ էր հետևել Նրան, եթե կարելի լիներ:
Բժշկվածի ծնողները առավել մանրամասն հարցերից խուսափելու համար, ասացին, որ իրենց որդին չափահաս է և թող ինքը պատասխանի իր հետ կատարվածի մասին: Նրանք էլ էին վախենում փարիսեցիներից: Այդ վախի պատճառով չէին կարողանում լիարժեք ուրախանալ իրենց որդու տեսողության ուրախությամբ; Գուցե ծնողները այդ պահին կուզենային փնտրել, գտնել և երախտապարտ լինել Հիսուսին և փառավորել Աստծու անունը, բայց փարիսեցիները նրանց ահաբեկում էին: Փորձում էին այդ ծնողներից վկաներ պատրաստել, որպեսզի մեղադրանք առաջադրեն Քրիստոսին; Չեն հանգստանում փարիսեցիների մի խումբ, որոնք անպայման շահագրգռված են ամբաստանելու Քրիստոսին, բայց չէին կարողանում ո՛չ բժշկվածի, ո՛չ էլ նրա ծնողի միջոցով դա կատարել: Նորից կանչեցին ի ծնե կույրին, որը բժշկվել էր և ստիպեցին Աստծու փառք տալ և համոզում էին որ այդ մարդը՝ այսինքն Հիսուս, մեղավոր է: Իսկ երիտասարդն ասում էր, որ ինքը տեղյակ չէ Նրա մեղավորությունից, բայց հստակ է որ ինքը կույր էր և հիմա տեսնում է: Տասնյակ անգամներ հարցնելուց հետո, տղան հոգնեց նրանց հարցերից և ասաց, Նո՛ր ասացի ձեզ, և չեք լսում, ինչո՞ւ եք ուզում նորից լսել, մի՞թե դուք էլ կամենում եք Նրան աշակերտել: Վիրավորվեցին տղայի այդ խոսքերից և ասացին,- դո՛ւ եղիր Նրան աշակերտ, մենք Մովսեսի աշակերտներն ենք, քանի որ գիտենք, որ Աստված Մովսեսի հետ խոսեց, իսկ սրան չգիտենք, թե որտեղից է:
Բուժված կույրը հրաշալի վկայություններ է անում, տեղյակ չլինելով նրանց նենգ մտածումներից: Ասում է,- Զարմանալին էլ այն է, որ դուք չգիտեք, թե Նա որտեղից է, բայց իմ աչքերը բացեց: Անտեղյակ երիտասարդը աստվածաբանական պատասխաններ է տալիս նրանց, որոնք կոչված էին մարդկանց ուսուցանելու Աստծու գործերի մասին, բայց հակառակն է կատարվել, հենց օրենքի ուսուցիչներն են հերքում իրենց կարդացած մարգարեությունները: Մարդը տեսնում է արդեն, և վկայում է այդ մասին, առավել ևս ասում է, որ, Եթե այն մարդը Աստծուց չլիներ, որևէ բան անել չէր կարող: Զարմանում է, որ մինչև հիմա չի եղել մի դեպք, որ ի ծնե կույրի աչքերը բացված լինի: Փարիսեցիները տեսան, որ առողջացածը առավել հիմնավոր վկայություններ է անում, վիրավորեցին նրան, ասելով,- Ամբողջովին մեղքի մեջ ես ծնված և դու մեր գլխին վարդապե՞տ ես դարձել: Դուրս հանեցին նրան տաճարից: Նույնիսկ մեղադրեցին նրան կույր ծնվելու մեջ, ինչի իրավունքը չունեին: Երբ Հիսուս իմացավ, որ տեսողությունը վերականգնած երիտասարդին դուրս են արել տաճարից. գնաց փնտրեց և գտավ նրան: Գտավ, որպեսզի աչքերը բուժելուց հետո հոգու փրկությունը ապահովի, քանի դեռ փարիսեցիները չէին մոլորեցրել նրան: - Դու Աստծու Որդուն հավատո՞ւմ ես,- հարցրեց Հիսուս նրան, գտնելուց հետո; Տղան ազնվորեն պատասխանեց,- Տէ՛ր ո՞վ է, որ հավատամ Նրան; Հիսուս նրան ասաց,- Ե՛վ տեսար Նրան, և՛ Նա է, որ խոսում է քեզ հետ: Իսկ երիտասարդն ասաց,- Հավատում եմ Տէ՛ր, և երկրպագեց Նրան; Տաճարից դուրս արեցին նրան իբրև պատիժ Հիսուսի մասին վկայելու համար, սակայն նրան դրսում Գտավ Աստծու Որդին և հայտնեց իրեն առողջացած մարդուն:
Չասաց, որ ես եմ քո աչքերը բուժել, այս այլ ասաց, Աստծու Որդին նա է, ում հետ խոսում ես: Քանի որ աչքերին կավ դնելուց և լվացվելուց հետո այլևս չտեսավ Հիսուսին, և փարիսեցիները նրա միտքը զբաղեցրին իրենց անմիտ հարցերով: Այս պահին երբ Հիսուս գտավ առողջացած մարդուն, մի գեղեցիկ ուսուցում տվեց բոլորի ներկայությամբ: Այնտեղ էին նաև փարիսեցիներից ոմանք: Տէր Հիսուս ասաց, - Դատաստանի համար եկա այս աշխարհը, որպեսզի ովքեր չեն տեսնում, տեսնեն, և ովքեր տեսնում են, կուրանան: Փարիսեցիներին դուր չեկավ այդ արտահայտությունը և հավանաբար իրենց տեսան այդ կույրերի մեջ և հարցրին Հիսուսին,- Մի՞թե մենք էլ կույր ենք: Հիսուս նրանց ասաց,- Եթե կույր լինեիք, դուք մեղք չէիք ունենա, բայց հիմա ասում եք, թե տեսնում ենք,և ձեր մեղքը ձեր մեջ հաստատ է մնում: Սիրելիներ հոգու կուրությունը ավելի ծանր է, քան ֆիզիկական կուրությունը: Հոգևոր կուրություն ունեցող փարիսեցիները դուրս արեցին տաճարից Քրիստոսին դավանող բուժված կույրին; Իսկ երբ Քրիստոսին դավանող որևէ մեկին վռնդեն ու հալածեն, նրան կգտնի և կմխիթարի Ինքը՝ Հիսուս Քրիստոս; Գլխավորն այն է, որ մարդը հոգևոր կուրություն չունենա: Աստված կամենա, որ ոչ ոք չունենա կյանքում հոգևոր կուրություն, որը տանում է մարդուն հոգևոր մահվան; Ավարտենք իններորդ գլխի սերտողությունը, որ ի ծնե կույրի բժշկության հրաշքի մասին էր և հոգևոր կուրությամբ տառապող փարիսեցիների անբուժելի հպարտ վարքի մասին էր: Վաղը կսկսենք տասներորդ գլխի սերտողությունը:
Թող համբերության և մխիթարության Աստվածը ձեզ շնորհ տա, որ դուք համախոհ լինեք միմյանց՝ ըստ Հիսուս Քրիստոսի, որպեսզի միասիրտ և միաբան փառավորեք Աստծուն՝ մեր Տէր Հիսուս Քրիստոսի Հորը: Թող Հույսի Աստվածը լիացնի ձեզ ամենայն ուրախությամբ և խաղաղությամբ, որպեսզի դուք էլ Սուրբ Հոգու զորությամբ՝ հույսով առատանանք:
Տեղեկութիւններ
Ձեր հարցումները
Hermine Qesablyan
Տեր մեր հոգու աչքերին էլ կավ քսիր ,որպեսզի կարողանանք ճշմարտորեն լսել քո ձայնը և կատարող լինենք մինչև վերջ🙏🙏
Zepur Khshvajian
Երանի մարմնով կույրին, որ թեև քրիստոսը չեր տեսած սակայն կատարեալ հաւատքով դավանեցաւ տեր Յիսուս քրիստոսը իբրև տեր և փրկիչ, և փրկություն ստացաւ.
Hasmik Danelian
Տերը մեզ սովորեցնում է ազատվել հոգևոր կուրությունից,որպեսզի ստանանք հոգևոր հավիտյան ապրելու և այս կյանքի և հանդերձանքով կյանքի համար,Փառք Քեզ Տեր ,որ գործում ես։ մեր մեջ
Manushak Yagubyan
Երբ մեզ նկատողություն են անում՝անմիջապես հակադարձում ենք մենք մեզ արդարացնելու համար, այսինքն ակն ընդ ական ենք անում, մինչդեռ Հիսուսին օրինակ ունենալով պետք է խոնարհություն ունենանք եւ լռենք
Hripsime Martirosyan
Տեր, բաց մեր հոգու աչքերը, տուր այնպիսի մի սիրտ, որ ըստ ամենայնի պաշտենք քեզ, հոժարակամ ու սրտանց կատարենք քո կամքը, քո օրենքների ու հրամանների համաձայն բացենք մեր հոգու աչքերը։
Arus Hakobyan
Իսկապես հեշտ է տեսնելու քողի տակ աչքերը պինդ փակելու սովորությունը ձեռք բերելը և պահպանելը։Մենք չենք ցանկանում իսկապես տեսնել,գուցե քանի որ հնարավոր է տեսնենք մեզ տհաճ որևէ երևո՞ւյթ, որ մեր օգտին չէ։
Armine Arutyunova
Տեր, քո թուքով շաղախված կավը մեր հոգևոր և ֆիզիկական աչքերի վրա լինի։ Որը ամեն օր լվանում ենք հանապազօրյա հացի ավազանում՝ աստվածաբանական գիտությունով։ Շնորհակալություն