Եթե մենք կիրակի օրը եկեղեցում չլինենք, երբ Սուրբ Պատարագի ժամանակ Խորհրդակատար քահանան խոսքը ժողովրդին ուղղելով աղոթում է. (Ձեզ նույնպես թող ազատի մարդասեր Աստված և ների ձեր բոլոր հանցանքները: Ժամանակ տա ապաշխարելու և բարիք գործելու: Թող ուղղի ձեր գալիք կյանքը հզոր
ողորմած Սուրբ Հոգու շնորհքով, նրան փառք հավիտյան: Ամեն): Իսկ ժողովուրդը քահանայից խնդրում են.
(Մեզ ևս հիշիր Աստուծո անմահ Գառի առջև):
Քահանան պատասխանում է.
(Հիշված կլինեք Աստուծո անմահ Գառի առջև):
Իսկ եթե մենք անհարկի չենք մասնակցում Սուրբ Պատարագին, որտեղ աղոթք է արվում մեր, մեր ննջեցյալների, մեր ազգի, մեր եկեղեցու, մեր բանակի համար, ապա ո՞վ պիտի պատասխանի աղոթքով
<< Ամեն, Տեր ողորմեա, Շնորեա Տեր, Կեցո Տեր, հիշեա Տեր և ողորմեա>>: Մտածելու առիթ է…
Երբ մենք կիրակի օրը չենք մասնակցում Պատարագին, միանգամից զրկվում ենք մի քանի օրհնությունից: Նախ մեզ կամավոր զրկում ենք աղոթքից ու խաղաղությունից, Պատարագի օրհնությունից ու մեր գոհությունից, և ամենակարևորը` Սուրբ Հաղորդությունից, այսինքն Քրիստոս մեր մեջ հայտնվելու եզակի հնարավորությունից: Չենք լսում օրվա պատգամը, հետևաբար չենք ունենում խորհելու թեմա: Չենք գնում, սակայն հարկ եղած ժամանակ մեզնից յուրաքանչյուրը փնտրում է աշխարհը փրկելու ծրագիրը: Պետք չէ փնտրել, որովհետև աշխարհը ունի մեկ Փրկիչ, ուղղակի նրան չի հետևում: Գնանք այսօր մեր աղոթքի տուն աղոթելով ճանապարհին, որպեսզի մեր սրտերը արդեն պատրաստ լինեն խոնարհվելու Տիրոջ առջև: Խնդրենք Տիրոջից իմաստություն, որպեսզի հասկանանք, որ աստվածպաշտությունը զորավոր է ամեն բանից: Գնանք ու սովորենք չարից պաշտպանվելու և պայքարելու լավագույն ձևերը, որովհետև`
Չարը չի հարվածում մեր ճակատին, այլ` թիկունքին…
Չարը չի գոռում, այլ շշնջում է անվերջ մեր մտքին ու ականջին:
Չարը չի մերժում, այլ հակառակը` հրապուրիչ է դարձնում մեղքը..
Մարդկային ուժերով ու ձգտումներով երկար չենք կարող պայքարել, կհանձնվենք առավելագույնը կես կամ մեկ տարի հետո: Մեզ աստվածային զորություն է պետք, Աստծո սպառազինություն է պետք չարի դեմ պայքարելու համար: Տեսեք, թե ինչ ասում Ս. Հովհաննես Ոսկեբերան Հայրապետը.
Իսկ սատանան հենց որ տեսնի, որ մարդու հոգում Աստծո օրենքն է գրված, իսկ սիրտը վերածվել այդ օրենքի քարե տախտակների, այլևս չի մոտենա նրան։
Համարենք, որ այս կիրակի է մեր փրկության օրը, և սա վերջին հնարավորությունն է: Բարի կիրակի, օրհնություններով լեցուն օր եմ մաղթում բոլորիս: