Է կիրակի. Ծաղկազարդ.

ՆԻՒԹԻ ՁԱՅՆԱԳՐԵԱԼ ՏԱՐԲԵՐԱԿԸ


Հոգևոր քարոզներ 2019

Այս Կիրակին կոչվում է Ծաղկազարդ.
Սիրելի ընթերցող, դու Պատարագից հետո կարող ես քո բոլոր գործերը ավարտին հասցնել, սակայն գործերդ ավարտելուց հետո չես կարող Պատարագ գնալ: Կիրակին կորցնում է իր հմայքը առանց Պատարագ, առանց աղոթք, առանց Սուրբ Հաղորդություն: Վեր կաց, արի, և քո ներկայությամբ լցրու եկեղեցին, թող քեզ վրա հեղվեն Սուրբ Պատարագի շնորհները, տրվող խաղաղությունը, ստացիր քո մեղքերի համար քավություն և թողություն պարգևող Սուրբ Հաղորդությունը: Վերադարձիր խաղաղված և ուրախ`մեր բոլորի Տիրոջ մեծ ողորմության շնորհիվ: Եթե չգաս, չես իմանա, թե հաջորդ կիրակի ինչ տոն է: Քրիստոնյան իրավունք չունի կիրակի օրը եկեղեցում չլինել:

 «Եթե նրանք լռեն էլ, այդ քարերը կաղաղակեն».
Այս տոնը Հայ Եկեղեցում կոչվում է Ծաղկազարդ, քանի որ եկեղեցիներում օրհնվում և հավատացյալներին են բաժանվում ուռենու նորաբողբոջ ոստեր՝ ի հիշատակ և ի նմանություն Երուսաղեմում Քրիստոսին ծաղկած ճյուղերով դիմավորող ժողովրդի: Իսկ երեկոյան կատարվում է Դռնբացեքի խորհրդավոր արարողությունը՝ իբրև Տիրոջ ողորմության խորհրդանշական հայցում Նրա փրկարար չարչարանքներին, քանզի Ծաղկազարդով սկսվում է Ավագ շաբաթը: Բացենք մեր տաճարի դռները Տիրոջ առաջ, որ մաքրագործի... Գնանք ընդառաջ, միանանք Նրան, ու այլևս չբաժանվենք Նրանից ինչ էլ որ պատահի մեր կյանքում: Ղազարոսի հարության հաջորդ օրը Հիսուս Քրիստոս, նստած ավանակի վրա, մտավ Երուսաղեմ՝ Զատիկի տոնի նախօրեին այնտեղ հավաքված ժողովրդի ցնծագին աղաղակների ներքո: Նրա առջև մարդիկ գետնին էին սփռում իրենց զգեստները և ծառերի ծաղկած ճյուղեր: Այնքան մեծ էր այդ ցնծությունը, որ փարիսեցիները նախանձելով՝ Հիսուսից պահանջեցին լռեցնել նրանց: Սակայն Տերը պատասխանեց. «Եթե նրանք լռեն, քարերը կաղաղակեն»: Ղուկ.19:40 Իսկ Տիրոջ խոսքը. «Եթե նրանք լռեն էլ, այդ քարերը կաղաղակեն». քարեր` երանելի առաքյալների կարծր և հիմք դնող քարոզությանն է ասում. եթե այդ մանուկներին արգելեմ, ապա Պողոսը, Նիկոդեմոսը, Գամաղիելը և Կայիափան, որոնք դեռևս անպտուղ են, հավատի մեջ` քարի նման և հրեության մեջ` խիստ անպտուղ, սրանք պիտի խոստովանեն իմ մարդացած Աստվածությունը և բարձրաձայն պիտի բարբառեն իմ երկու` առաջին և երկրորդ գալստյան մասին:
Դարձյալ` «Այդ քարերը կաղաղակեն». պետք է իմանալ նաև, որ քարերը մարգարեներն են, որոնք օրենքի ժամանակ շինության հիմքեր հանդիսացան, և նրանց մարգարեական խոստովանությունը: Նրանք կանխապես գուշակելով բովանդակ տնօրինությունը` ապագայում եղողներիս գրով հիշատակ և անկողոպտելի գանձ թողեցին երկու հավատարիմ վկաներով` մարգարեական և ավետարանական աստվածաբանության գրքերով:  Մեր Տերը թող տոնախմբողներիս նույնպես արժանի դարձնի նոր արքայությանը, քանզի Նրանն են փառքը և զորությունը հավիտյանս. Ամեն:
Զատկից մեկ շաբաթ առաջ Հիսուսն իր աշակերտների հետ մոտեցավ Երուսաղեմին: Երուսաղեմը այն քաղաքն էր, որտեղ պետք է տեղի ունենար ամենամեծ և ամենակարևոր իրադարձությունը: Ձիթենյաց լեռան մոտ Հիսուսը կանչեց աշակերտներից երկուսին և ուղարկեց Բեթփագե գյուղը: «Գնացե՛ք ձեր դիմաց գտնվող գյուղը,- ասաց Նա,- այնտեղ կապված մի ավանակ կտեսնեք, որի վրա ոչ մի մարդ դեռևս չի նստել, արձակեցե՛ք և բերե՛ք»: Ինչպես Հիսուսն ասաց աշակերտներին, նրանք այդպես էլ արեցին: Բերեցին ավանակը, վրան զգեստներ փռեցին, և Հիսուսը, վրան նստած, մտավ Երուսաղեմ: Նրան ցնծությամբ դիմավորեց ժողովուրդը. մարդիկ իրենց զգեստներն ու արմավենու ճյուղեր էին փռում Հիսուսի ոտքերի տակ և գոչում. «Օրհնությո՜ւն Դավթի Որդուն, օրհնյա՜լ է Նա, ով գալիս է Տիրոջ անունով: Խաղաղությո՜ւն երկնքում և փա՜ռք բարձունքներում»:
Շատերն էլ տարակուսած հարցնում էին նրա մասին. «Ո՞վ է սա»: Իսկ նրան փառաբանողները պատասխանում էին. «Նա Հիսուս մարգարեն է՝ Գալիլեայի Նազարեթ քաղաքից»: Շատերն էլ վկայեցին, որ նա Ղազարոսին վերակենդանացրել է և զարմանալի հրաշքներ գործել: Այդ ժամանակ փարիսեցիներն իրար մեջ ասացին. «Տեսնո՞ւմ եք, որ ոչինչ անել չենք կարողանում, ողջ ժողովուրդը նրա հետևից է գնում»: Եվ, դառնալով Հիսուսին, ասացին. «Սաստի՛ր քո աշակերտներին, որ դադարեն փառաբանել քեզ»: Իսկ Հիսուսը նրանց պատասխանեց. «Ասում եմ ձեզ, որ եթե նրանք լռեն էլ, քարե’րը պիտի աղաղակեն»: Ծաղկազարդի տոնին Սուրբ Պատարագ է մատուցվում, և մանուկները, գնալով եկեղեցի, հատուկ օրհնություն են ստանում հոգևորականներից: Այդ օրը մարդիկ ուռենու բողբոջած ոստերն օրհնել են տալիս հոգևորականներին և տանում իրենց տուն: Ծաղկազարդի օրը եկեղեցիներն ու նրանց շրջակայքը գարնանային զանազան ծաղիկներով են զարդարվում, քանի որ ամենուր կարելի է տեսնել ծաղկավաճառների, որոնցից գարնանային ծաղիկների փնջեր գնելով՝ մարդիկ դրանք միմյանց են նվիրում:

Մամբրե Վերծանող.

Օրվա ընթերցվածք.

Ավետարան ըստ Հովհաննեսի 12.12-23

12 Յաջորդ օրը ժողովրդի բազմութիւնը, որ Զատկի տօնին էր եկել, երբ լսեց, թէ Յիսուս Երուսաղէմ է գալիս, 13 արմաւենիների ճիւղեր վերցրեց եւ Յիսուսին ընդառաջ ելաւ: Աղաղակում էին եւ ասում. «Ովսաննա՜յ, օրհնեա՜լ լինես դու, որ գալիս ես Տիրոջ անունով, ո՛վ Թագաւոր Իսրայէլի»: 14 Եւ Յիսուս, մի էշ գտնելով, նստեց նրա վրայ, ինչպէս որ գրուած է. 15 «Մի՛ վախեցիր, ո՛վ դուստրդ Սիոնի, ահա քո Թագաւորը գալիս է՝ նստած մի էշի քուռակի վրայ»: 16 Եւ նրա աշակերտները սկզբում այն չհասկացան, բայց երբ Յիսուս փառաւորուեց, այն ժամանակ յիշեցին, թէ այդ նրա մասին էր գրուած, եւ իրենք այդ էին արել նրան: 17 Իսկ ժողովուրդը, որ նրա հետ էր, վկայում էր, որ Ղազարոսին հէնց գերեզմանից կանչեց եւ նրան մեռելներից կենդանացրեց: 18 Եւ դրա համար էլ նրան ընդառաջ ելաւ ժողովուրդը, որովհետեւ լսել էին, որ այդ նշաններն է արել: 19 Իսկ փարիսեցիները միմեանց ասում էին. «Տեսնում էք, որ ոչ մի օգուտ չէք ստանում. ահաւասիկ ամբողջ աշխարհը նրա յետեւից գնաց»: 20 Այնտեղ կային նաեւ որոշ թուով հեթանոսներ՝ նրանց մէջ, որ Երուսաղէմ էին եկել, որպէսզի տօնի ժամանակ երկրպագութիւն անեն: 21 Նրանք մօտեցան Փիլիպպոսին, որ Գալիլիայի Բեթսայիդա քաղաքից էր. աղաչում էին նրան ու ասում. «Տէ՛ր, ուզում ենք Յիսուսին տեսնել»: 22 Փիլիպպոսը եկաւ եւ Անդրէասին ասաց: Անդրէասը եւ Փիլիպպոսն էլ Յիսուսին ասացին: 23 Եւ Յիսուս նրանց պատասխանեց ու ասաց. «Հասաւ ժամը, որ փառաւորուի մարդու Որդին: